1  Solvitur acris hiems grata vice ǁ veris et Favoni
             trahuntque siccas ǁ machinae carinas,
         ac neque iam stabulis gaudet pecus ǁ aut arator igni

             nec prata canis ǁ albicant pruinis.
   5    Iam Cytherea choros ducit Venus ǁ imminente luna
             iunctaeque Nymphis ǁ Gratiae decentes
        alterno terram quatiunt pede, ǁ dum gravis Cyclopum
             Volcanus ardens ǁ visit officinas.
        Nunc decet aut viridi nitidum caput ǁ impedire myrto
10          aut flore, terrae ǁ quem ferunt solutae;
        nunc et in umbrosis Fauno decet ǁ immolare lucis,
             seu poscat agna ǁ sive malit haedo.
        Pallida Mors aequo pulsat pede ǁ pauperum tabernas
             regumque turris. ǁ O beate Sesti,
15    vitae summa brevis spem nos vetat ǁ inchoare longam.
             Iam te premet nox ǁ fabulaeque Manes
        et domus exilis Plutonia, ǁ quo simul mearis,
             nec regna vini ǁ sortiere talis
        nec tenerum Lycidan mirabere, ǁ quo calet iuventus
20         nunc omnis et mox ǁ virgines tepebunt.